婚禮當天中式出入門絕對係當日其中一個最重要儀式之一，化妝，著褂，玩新郎，斟茶，出門，入門都會喺呢個時候發生，所以地點就相當緊要，如果唔喺屋企出門，想喺酒店出門，究竟應該點揀同有乜選擇？
今次係從攝影師角度，去講下點由光線，間隔，裝飾，大堂上落車位等等去揀下出門酒店
以下係我嘅推介：
- 瑰麗酒店 ( Rosewood Hotel )
- 香港美利酒店 ( The Murray Hong Kong)
- 半島酒店 ( The Peninsula Hong Kong )
- 香港麗思卡爾頓酒店 ( The Ritz-Carlton, Hong Kong )
- 嘉里酒店 ( Kerry Hotel )
- 沙田凱悅酒店 ( Hyatt Regency Shatin)
- 四季酒店 ( Four Seasons Hotel )
- 灣仔君悅酒店 ( Grand Hyatt Hotel )
- JW萬豪酒店 ( JW Marriot)
地址： 尖沙咀梳士巴利道18號
Website: https://www.rosewoodhotels.com/en/hong-kong
Tel: +852 3891 8888
Rosewood係近年新人結婚大熱之選，2019年開業，設施或ballroom都仲係好新，酒店設計非常華麗，從大堂到房間都見到豐富多樣同精雕細琢嘅傢私，非常適合喜歡典雅同細節嘅情侶。
攝影師Billy意見：「出門房間通常都面向維港，充足嘅自然光線令到早上接新娘及斟茶環節嘅拍攝更加容易。但某啲時段房間都會背光，咁我就會選擇用傢俬做背景拍攝，人物就會有好靚嘅側光打落去。
而出門時，由搭𨋢到大堂門口都好多地方影相，例如我就好鐘意影出𨋢嗰一下，用硬光拍攝充滿時尚感。
樓下大堂除咗正門都仲有個側門幾靚，就算同時有幾對新人一齊出門都可以有其他位置拍攝。
但如果新人係喜歡簡潔風格嘅酒店，可以睇埋陣間介紹嗰啲。」
地址： 中環紅棉路 22 號
Website: https://www.niccolohotels.com/en/the-murray-hong-kong
Tel: +852 3141 8888
Murray 亦都係一座比較新嘅酒店，2018年開業，位處中環金融區，建築走時尚型格路線，充滿幾何線條設計嘅酒店大堂，以白色和銅金色做襯托，簡潔得嚟帶點華麗。
攝影師Billy意見：「Murray酒店外有唔少打卡位，例如平台天橋旁的一棵百年老樹節果決明，就係遊客同新人出門外影時嘅大熱拍攝地點。而平台另一邊有一條活化後嘅斜路，前身係車道嚟，新人出門時可選擇喺斜路頂同一班兄弟姊妹開心地行呢條斜路，拍攝效果非常唔錯呢。
我就幾鐘意影Murray出門，因為我鐘意構圖時有啲幾何線條喺張相度，而Murray白色嘅外牆令到整體感覺簡潔得嚟但充滿時尚感。
出門房唔係典型大窗口，但因室內設計都以白色為主，所以影出嚟都光亮通透。
而最多人鐘意佢嘅地方係，Murray係一間Pet Friendly Hotel，好多新人都想wedding day帶埋自己寵物嚟參與，咁Murray絕對係首選。」
地址：尖沙咀梳士巴利道22號
Website: https://www.peninsula.com/
Tel: +852 38918888
半島酒店係香港歷史最悠久嘅高級酒店，巴洛克復興風格式建築，但房間設計卻走古典優雅帶少少中國風的色彩的路線。高層房間都可清楚望向維多利亞港，而且離地鐵站只有5分鐘路程，十分方便。
攝影師Billy意見：「我幾鐘意影半島出門，因為佢哋嘅出門房非常有自己signature，好classic and vintage的感覺，尤其係牆上嘅立體曲線金屬花葉樹枝裝飾，係半島房間最signature嘅裝飾。
而佢哋房間牆身色調及傢俬主要係米色及啡色做主色，冇非常浮誇嘅裝飾但又充滿細節，呢種低調嘅奢華襯起中式褂或婚紗都係會令成個格調提升。影相時新人就咁簡單企喺度望鏡頭已可做出非常elegant及timeless嘅相。
而其中一樣我最鐘意嘅係佢哋出門花車係用Rolls Royce，基本上新人係唔洗裝飾架車都冇問題。我好鐘意影新人上車，無論係褂定係婚紗，出門花車人像我係有自己一套影法，而Rolls Royce 因為度車門係反向咁開，影嘅角度係同其他花車唔同，感覺係大氣好多，加上半島門外嗰種舊歐式風格建築，影出嚟係好vintage and classic。
唯一要注意嘅係check in/ check out時間門口會比較繁忙，呢段時間如果同時有幾對新人出門影花車就預咗要等下。 」
地址：柯士甸道西1號環球貿易廣場
Website: https://www.ritzcarlton.com/en/hotels/hkgkw-the-ritz-carlton-hong-kong/overview/
Tel: +852 2263 2100
Ritz Carlton 係全球最高酒店之一，由出門房間俯瞰身下的維多利亞港，非常震撼。 房間設計以暖色為主色，不同的細節都帶有濃厚的東方色彩。酒店大堂在103樓，由地下搭lift上大堂大概1分鐘，然後要在大堂再轉lift到房間。
攝影師Billy意見：「好天時喺Ritz Carlton拍攝出入門係靚到令你唔捨得離開間房，如果夠早，陽光未係好猛烈，會有好靚好靚嘅soft side light。如果可以，book一間有90度景觀嘅房間會更加震撼，budget許可喺Carlton Suite出門更係一個難忘嘅體驗。
當然，咁高嘅房間，唯一嘅concern係當唔好天時，對拍攝嘅影響都係首當其衝，係有機會窗外全部都係雲白色一片，咩都望唔到，但11-1月唔係雨季就好啲。
另外要留意係由房間出門到樓下拍攝要預啲時間搭lift，始終都係由百幾樓落嚟同埋要轉lift。
總括嚟講我都非常推介喺Ritz Carlton出門，除咗景色，佢哋服務都非常好呀！
同埋，如有時間都可以喺天龍軒條金色走廊影下，都係熱門打卡位～」
地址: 香港特別行政區香港九龍紅磡灣紅鸞道38號
Website: https://www.shangri-la.com/en/hongkong/kerry/
Tel: +852 2252 5888
嘉里酒店位於黃埔海濱，是熱門出門酒店。酒店房間以米白做主色，光線非常充足，且可看到維港景色。而大堂的旋轉樓梯也是大熱出門必行路線。
攝影師Billy意見：「唔錯的一間出門酒店，我鐘意佢冇太多太busy嘅設計，由大堂到房間都以簡潔優雅為主，很適合喜歡構圖簡潔的新人。
新人出門時可選擇喺大堂上一層出lift，經過旋轉樓梯再落大堂出門，咁就多一個angle可拍攝。
大堂後門外有個平台可以影到維港，外影就算唔出去，留喺酒店都已經夠影。」
地址：新界沙田澤祥街18號(大學站旁)
Website: https://www.hyatt.com/zh-HK/hotel/china/hyatt-regency-hong-kong-sha-tin/shahr
香港沙田凱悅酒店相信係最多人出門的酒店，房間光猛而且闊落，背山面海，環境清幽，大堂外落車位非常闊落，就算多對新人一齊出門都不成問題。
是性價比非常高的一間出門酒店
攝影師Billy意見：「我幾鐘意沙田hyatt嘅出門房，大窗口，向海，非常充足嘅自然光。而裝修係偏向實用簡單，唔會有太多裝飾去阻礙影相。有時攝影師想要嘅其實就係乾淨嘅background同自然光，咁已經好易可以有好多靚相。
而因為就算唔係喺度擺酒嘅新人都可以book出門房，所以大旺日係可以好多人一齊同時出門，試過影相當日問過酒店職員佢話當日有25對新人會出門！所以要預番時間等lift，經驗話我聽係可以等15分鐘先落得哂新人加兄弟姊妹加攝影團隊。」
地址：香港中環金融街 8 號
Website: https://www.fourseasons.com/zh_hant/hongkong/weddings/packages/wedding-suite-package/
Tel: +852 3196 8333
四季酒店都係香港最top酒店之一，服務係香港酒店中天花板中的天花板，房間有無敵海景，而且位於中環金融街，鄰近IFC，非常方便。而酒店只會俾在四季擺酒嘅客人做出門，所以出門時唔會有同時10對新人一齊出門嘅情況出現。
攝影師Billy意見：「我最鐘意影嘅其中一間酒店，首先係房間面向維港，十分明亮，而成間酒店個tone都係以白或淺木色為主，非常優雅高貴。 大堂樓底超高，影出嚟好有空間感。而條旋轉樓梯更係佢地特色，出門或外影都可選擇喺條樓梯度影下，或者門外有個公園仔都係外影經常會影嘅位。」
地址：香港灣仔港灣道一號
Tel: +852 2588 1234
Website: https://www.hyatt.com/en-US/hotel/china/grand-hyatt-hong-kong/hkggh/special-events/weddings
Grand Hyatt係香港老牌酒店之一，好多名人都住過，大部分出門房都望到維港，大堂採用深色做主色，氣派十足。
攝影師Billy意見：「最有情意結嘅一間酒店，因為自己都喺度結婚，係香港少數擺到50圍以上嘅酒店。出門房夠光猛，但大堂門口影相唔算太大，所以通常都會去11樓pool house 有排樹路去影下兄弟姊妹合照。」
地址：金鐘道88號
Website: https://www.marriott.com/en-us/hotels/hkgdt-jw-marriott-hotel-hong-kong/overview/
Tel:+852 2810 8366
JW Marriot 係金鐘3大酒店之一，位於金鐘站上蓋，可直到太古廣場，交通非常方便，唔怕親友朝早斟茶唔識嚟。
攝影師Billy意見：「以唔係最新嘅酒店嚟講，我覺得JW Marriot 保養得幾好，大堂至房間都keep到modern嘅感覺，而房間有90度大窗，採光靚，面向金鐘中環嘅樓景更添時尚感。
而大堂外有一個廣場仔可用嚟影兄弟相或出門相， 非常方便而且好寛躺。
都係一間我會推介嘅出門酒店。」
You might also like
