呢兩年因為COVID,大家都冇得出Overseas 影 Pre-Wedding,變咗要留喺香港影,而開始見到有好多媒體經常介紹好多香港新景點或秘景,然後標題會寫「香港的威尼斯」、「香港的京都」、「香港的荷蘭」等等呢類等你彷似身處外國一樣。

但我呢一年反而好想影番啲「好香港」嘅景點, 無需要修飾到變做外國嘅乜乜乜,而係將香港自身擁有嘅面貌,好自豪咁同人講:呢度就係香港嘅中環,香港嘅尖沙咀,香港嘅大澳。 揀呢啲地方影婚照絕不失禮呀。

今年影Pre-Wedding影多咗好多尖沙咀,我覺得係九龍區其中一個最香港嘅景點,一條梳士巴利道兩旁就已經有半島酒店,文化中心,海旁,天星小輪,呢啲都係我由出世時已經有,由英殖年代到而家都喺度嘅建築。

1. 半島酒店

半島酒店係係香港現存歷史最悠久嘅酒店,亦係香港以至全球最著名嘅酒店之一,以巴洛克复興風格建造,非常代表到殖民地時代香港上流階層嘅一面。

2. 文化中心

香港文化中心的建築設計曾被文化界人士批評外觀醜陋,但其實我好喜歡當中充滿線條同幾何的空間感。

3. 天星小輪碼頭

小輪是最有香港味道的交通工具,120年來穿梭著港島同九龍,見證住呢度由小漁村到國際大都會,每次坐都好喜歡船身及碼頭那復古但又唔老土嘅深綠色,亦都好鐘意著住水手服的水手叔叔們,而小輪的上下層各有特色,大家坐開上定下?

4. 尖沙咀海旁

有幾多情侶喺呢度擁抱過?面向維多利亞港,日落時的景色加上由高樓大廈組成的海岸線,吸引無數世界各地的人來。曾經,我一位希臘的朋友來到,佢用驚嘆的表情同我講喺希臘從未見過超過十層的建築,但呢度見親都係幾十層,甚至一百層。